Områdeplan for Bjørkheimsområdet: Oppstart av revisjon av planen.

Me varslar med dette om at Områdereguleringsplan for Bjørkheimsområdet skal reviderast. Frist for å koma med innspel er 31. mars.

Publisert: 04.03.2021

Sist endra: 04.03.2021

Det vert med heimel i plan- og bygningslova § 12-8 varsla oppstart av arbeid med revisjon av områdereguleringsplan for Bjørkheimsområdet. Innspel til planarbeidet kan sendast innan 31. mars til postmottak@samnanger.kommune.no eller Samnanger kommune, Tyssevegen 217, 5650 TYSSE.

Planområdet er synt med raudt omriss i oversiktskartet nedanfor, og ein større versjon ligg som vedlegg. For kart og plandokument i gjeldande plan syner me til:

Kommunekart: https://kommunekart.com/?urlid=d60409d5-bfa8-4df3-ac98-a535d4036897
Planregister: https://webhotel3.gisline.no/Webplan_4623/gl_planarkiv.aspx?planid=1242201001

Oversiktskart med planomriss

Tema for planarbeidet

Tema for planarbeidet er synt i punktlista under. Andre innspel vert også mottekne, men innspel innanfor dei nemnde tema vil verta prioritert med mest arbeidsressursar.

Trafikksikring og trafikkflyt ved busstopp, overgangsfelt og innkøyring til sentrumsområdet. Det er eit mål å finna andre løysingar enn dagens krav om undergang, som er for kostandskrevjande til at den let seg realisera.
Areal til innfartsparkering og annan offentleg parkering. Korleis er parkeringssituasjonen for eksisterande verksemder og funksjonar? Den offentlege parkeringsplassen o_PP1 er ikkje etablert. Her kan det vera mogleg å tilpassa eit parkeringshus inn i skråninga mot fylkesvegen. Vil det vera eit godt grep for Bjørkheim?
I Samnanger kommune er det behov for eit område for plasskrevjande forretning/næring, og dette bør lokaliserast nært fv 49 (tidlegare fv 7). Det vil bli vurdert og utgreidd eit areal ved avkøyringa til Bjelkarvika, på landbruksareal v/Lauvskarmyra. Sjå også vedlagt brev frå Bjørnafjorden landbrukskontor.
Avkøyrsla til bustadområdet i Bjelkarvika må utbetrast for å leggja til rette for vidare bustadbygging i tråd med kommuneplanens arealdel, samt eventuell plasskrevjande forretning/næring. (Sjølve bustadområdet må realiserast med eigen, privat reguleringsplan).
Gang- og sykkelveg frå Bjelkavik til Haukaneset. Denne er avklart i kommuneplanens arealdel, men nøyaktig trasé må regulerast.
Det er behov for justeringar innanfor sentrumsareala, for tilpassingar til utbygd situasjon, og for å løysa problemstillingar som ein ikkje fekk løyst i førre planrunde. Det skal gjennomførast eit moglegheitsstudium for å få maksimalt ut av Bjørkheim sitt potensiale. Sjå vedlagt vedtak om moglegheitsstudium.
Hovudgrep for gåande og syklande. Det må vera enkelt å gå, sykla og ta kollektivtransport til Bjørkheim, og det må vera trygt og oversiktleg å ferdast inne i sentrum. Moglegheitsstudiet skal kasta lys over desse samanhengane, og koma med framlegg til å sikra eit avklart, ryddig og estetisk sentrum.
Kommunen si tomt F/K/T1 (forretning, kontor, tenesteyting), SH1 (gjestehamn) og P1 (park): Kva er moglegheitene for kommunen si tomt nede ved Grunnavågen, og korleis kan den vera med å bidra til attraktiviteten til Bjørkheim? Utvikling av kommunen si tomt F/K/T1 må plasserast inn i ein samanheng med torg, park, småbåthamn og eksisterande strandline/naturkvalitetar. Størstedelen av arealet som er regulert til park P1 og gangareal (G1) er ei grusa flate– korleis kan me tilretteleggja dette som eit attraktivt opphaldsareal ved fjorden?
Bubilparkering og tøming av toalett. Det grusa arealet nemnd i førre punkt har etablert seg som parkeringsplass for mellom anna campingturistar. I gjeldande reguleringsplan er dette arealet avsett til park og gang- og opphaldsareal, og vegen ned dit er regulert til gangveg. Parkering av campingbil/-vogn er i strid med planføremålet. Planarbeidet må avklara moglegheitene for alternativ plassering av bubilparkering i Bjørkheimsområdet. Det må også avklarast om tømeanlegg for bubiltoalett kan lokaliserast i Bjørkheimsområdet.
Bjørkheim treng eit offentleg toalett og me må finna den beste plasseringa, der ein balanserer tilgjengelegheit, synlegheit, estetikk, nærleik til offentleg VA-nett m.m.